連續四日放假，應該係我哩兩年黎第一次(不過唔代表我過去果兩年好忙，只係打散黎放0者；亦唔代表我哩排好嘆，唔係放假既日子，未計交通每日都已經番十一、二個鐘，蝕晒)

終於有足夠時間玩下bio harzard5，暫時感覺好似metal gear，不過論劇情同畫面，始終metal gear0係我心目中係高點點。

入camp既日子，撞0岩D電視劇冇套好野，什麼大冬瓜、大老爺、卓球天王，全部都難以頂到超過五分鐘。即使係0岩0岩成為城中話題既學警3，我都認為佢從劇情、對白等多方面既技術上都係低能既。我實在未能投入laughing效應。

再睇下有乜電影先。PTU系列已經出左好幾隻，暫時我最鍾意<警例>同<人性>，<人性>入面既林家楝係個設計得好過癮既角色。但因為成本關係，不能從製作上對哩個系列有要求，需要從劇情或者演員中尋樂趣。但我實在唔係好明白銀河拍PTU系列既用意0係邊。為錢？為藝術？有訊息想表達？據我估計，應該係杜sir俾班新導演(劉國昌、羅永昌等人)既練習。學習點樣用最低既本錢拍出最大效果。因為未來既電影業我諗最大既難題會係點搵錢去開部片。

又睇下一D大收旺場既戲丫。今年農曆新年票房冠軍<家有喜事2009>，我已經唔係抱住好大既期望去睇，見佢話晒都票房冠軍，又見好多人話好好笑，我就姑且試下租黎睇。結果，我決定以後唔會再花任何錢去睇谷德昭拍既電影。

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

有人既世界，應該係不斷進步；但同時有人既世界，亦係不斷邁向滅亡，每個範疇如是。

樂迷選擇佢地既偶像，因為有樂迷存在，嚴重走音既歌手先有生存空間，先會不斷咁出現，一代新人勝舊人。

電視迷選擇心愛既劇集、節目，什麼劇集受歡迎從收視率可一目了然，甚至會出現網絡效應，電視台知道大家鍾意乜，就會改結局，甚至開拍電影。

影迷選擇喜歡既電影，票房反映出大眾既品味。票房亦決定哪一套戲、哪一名導演有資格開續集、長拍長有。

讀者選擇讀物，銷量決定方向。報紙頭條不外乎政府、名人醜聞，死人冧樓，雜誌封面就係趙碩芝、周秀娜、Kama。

選民選擇立法會入面既議員，入面縱然有為數唔止一個既人蔑視會議、爆粗，但歸根究底，佢地都係被投票選出黎的。

我地選擇生存既環境，能源危機、溫室效應，來自我地唔係真係太必要既私家車、辦公室冷氣、招牌、商場電燈……

每一個結果，都係人既選擇。雖然唔係全數一致，但哩個世界係少數服從多數。遇到不順眼事，我地唔應該屌個結果，而係屌果班製造結果既人。

以上既一切，有D可以改變(不過都好難)，有D已經冇回頭路。

上面幾行字，係好灰的，但唔代表我好悲觀。相反地，我更加去識享受同選擇。

 <街頭霸王>係遊戲史上最經典既格鬥遊戲，我細細個已經聽過哩個名喇，論殿堂地位始終比<拳王>略高一籌。

首先，我係從好細個既時候，已經成日出入機舖，重係著住件小學校服添。果時又冇乜人理，阿爺知我鍾意打機所以帶我去，佢又唔怕我學壞，所以成日放學去明園西街(而家中間界餐廳個位)同埋新都城地下間機舖(間野個名叫"機城"，係而家惠康既其中一忽)。而果幾年間，我玩得最多既遊戲就係<街霸>。

<街霸1>係格鬥遊戲既先祖，由於係實驗作品，好多野都未完善。冇得揀太多角色，出招又難，果時我又太細個，唔識玩。到左<街霸2>，就真係風靡所有機舖，最初收費四蚊舖(果時多數遊戲都係一蚊舖咋)，都重要有勁多人排隊打。事關<街霸2>真係有突破性既發展，操作、系統、角色設定、各方面既平衡都完善，成為日後格鬥遊戲既典範，SNK見Capcom搞到風生水起，又出<餓狼傳說>、<龍虎之拳>等等，但都唔及<街霸2>咁有韌力。

果時我都真係俾左好多錢0係哩隻遊戲度，所有角色都練到熟晒，最初用阿龍、阿ken，出波出昇最易上手；之後又用軍佬貪佢出完手刀、腳刀後，硬直時間短夠靈活；又用蘇聯佬貪佢離人個半身位都可以吸人出旋風倒頭樁夠恐怖；春麗跳高彈下彈下係咁踩人；青狼、相撲佬、印度佬都有練過，印象中未試過用蘇聯佬、相樸佬同印度佬一舖爆機。到左中期，又有好多人玩軍佬，皆因原祖<街霸2>哩個version有個好經典既bug，就係軍佬既單腳企、痴身、無影撻，無影撻比起草雉京或者八神既任何連招更屈機，隔兩個身位就後儲、前、後+重腳+重拳(腳要比拳早按些少)，哩係個出招方法都零舍特別，果時反而熟手，而家要我出番哩招我諗都幾難。

然後<街霸2>陸續出加強版，首先係有得用四大天王(拳王、鐵面、沙加同司令)，又係成村人圍住部機。之後又有咩東方不敗版，係D街機商唔知點改左設定，取消晒出招之後既硬直時間，可以連環出波動拳，而且係曲線軌道，所以成個畫面有七、八波動拳飛黎飛去、或者有一排艾力姑。

果時街機文化亦都成形，出現左擺一蚊跟機、讓round、暈左唔可以追打哩D不明文規矩。試過有次我用春麗玩挑機，對方個大哥哥就用司令，果條契弟輸左俾我之後就熄左部機，幾撚冇品，

不過capcom去到哩個時候都開始技窮，再出加強版(改下顏色同埋能力平衡)甚至十六人版(又加入超必殺技)，最後再加隱藏角色豪鬼，市場反應都唔係好大。適時拳皇興起(拳王第一集係94年)，街霸地位開始勢弱，97到01年哩段期間更完全係拳皇壟斷街機市場。而我大部分既打機時間都轉投番電視遊戲機。

但係唔代表我再冇玩<街霸>，因為去到playstation、saturn既年代，我都有買<街霸>電影版、Zero1、Zero2既遊戲，論遊戲當然係越出越好玩，但係突破性就唔大。之後都有D新嘗試，例如立體版，或者crossover拳皇，不過遊戲界既野已經五花八門，又賽車、玩槍、跳舞機、音樂機、高達，D人打格鬥已經冇當初咁狂熱。出<街霸3>果時我都冇乜點玩過。

<街霸>同<拳皇>我都有玩，兩者唔同之處係拳皇除左係玩隊制外，主要係玩連招，我又玩得唔係好精，成日俾人一下無端端冇左半條血都唔知發生乜事；而<街霸>就玩心理戰多D，冇果D俾人吊0係半空強姦既感覺。其實兩者各有擁躉，冇話邊隻絕對好玩D(是但一隻玩得多都悶啦)。

而<街霸4>上年0係街機出左，論畫面的確幾吸引，過幾日就0係ps3出，我打算買番黎入camp前消磨下都唔錯。

16件事：

1.其實我既理想唔係想做警察，我想做一個殺手，但係我諗唔到有乜方法入行。

2.有D自戀。

3.間中會熱播某D歌手既舊歌，近日聽得比較多既係盧冠廷。

4.某D人以為我好鍾意Janice Man或者Angela Baby，其實我只係覺得佢地靚。論鍾意，還不及Lisa S.、周汶綺等，更枉論同熱愛既Natalie Portman、孫燕姿同王菲相比，至少我唔會為左Janice Man入場睇<內衣少女>，但如果王菲再0係香港開演唱會，我諗我會傾家盪產同請大假睇足咁多場。

5.我會食零食，但係比較抗拒新事物。來來去去都係鍾意食熱浪、三角朱古力、能得利提子糖、百力枝哩D經典。最愛既係有辣味既臭腸(其實都唔係好臭0者)，不過而家好似少左地方賣。

6.我對免費下載又愛又恨，畢竟我亦得到過太多既方便，但亦明白佢對正版市場既禍害，電影同唱片市場已經萎縮到難以生存既地步，製作既條件因為錢既問題而有多方面既限制，所以我依然經常入戲院同埋遇到好音樂我都會買碟收藏，我亦會向身邊既人咁講。

7.我覺得講電話講得耐會令隻耳好熱、隻手好累、條頸好醱、個頭好暈，其實我本身唔太討厭講電話既，假設有內容的話，我都還可有說有笑。我係絕對討厭對方0係電話度唔出聲、沉默而依然要保持通話，浪費時間精神之舉，完全係挑戰我既底線。夜晚1點後打黎既講數電話，如欲和氣收場，請速戰速決，哩個時候我就算未訓，我對電話既忍耐力係好低的。

8.希望將會可以有一段日子做個浪人，去D偏遠地方例如西藏、墨西哥之類周圍盪，當然係要有足夠錢傍身果D。

9.唔需要好長命，最重要身體健康。只有身體健康既人，先有能力去享受生活。

10.唔太識拒絕人係我既缺點，但我一定會改左佢。

11.我著衫崇尚個人風格，同時其實我唔多買新野，我大部分既衫、褲、鞋、袋都會用多過三年。

12.認為快樂固然值得享受，但同時極度既痛苦亦係人生重要既階段，需要深切感受。就似電影<搏擊會>入面男主角灼傷自己手背既感覺，可能日後會對自己既生命有重大既啟示。

13.熱愛陽光與海灘，可惜香港沙灘既環境比較差，同埋冇幾多個章子怡。

14.眼界越廣就會覺得自己所擁有既力量越渺小，能夠擴闊既只有內裡既胸襟。

15.我奇怪好多人都話"只希望"一生人做到無悔，我真係R晒頭有乜可能，而且重用個"只"字。我每日都總會有D大大小小既後悔或者遺憾。我對於哩種懶瀟灑又似是而非既對白感到好反感。

16.我有兩隻好重要既熊仔，望住佢地，我既戾氣會冇咁重，煩惱冇咁多。

頭先睇有線電視又睇到幾個有趣既戲名：<殺出香港>、<清官斬孝女>、<有緣千里一錢牽>。

近日所做的事：

玩nds：最近玩左三隻新遊戲，首先有<惡魔城-被奪的刻印>，惡魔城系列係我最鍾意既橫向動作遊戲，畫面靚、武器多、招式豐富、地圖大、有升級系統同收集元素，令哩系列遊戲既耐玩度好高，出咁多集我都盡量會玩；跟住係<超時空之鑰>，nds版會保留ps版既動畫，比超任版會加左些少野，不過新加既野冇乜故事性(可能因為原本已經好完整)，應該下隻我再玩既rpg遊戲會輪到square enix0係ps3上出既野喇；最後係<模擬便利店ds>，最初玩哩隻game既元祖版本係0係sega saturn度，反而果次造得比今次好同豐富，重諗住事隔多年，今次哩隻會好玩好多，點知好多應有既系統都deleted左，新不如舊……

睇戲：<證人>，算幾好啦，不過我依然抗拒個人英雄主義既警匪片，同埋撞車一段的確屬堆砌。以處理手法而論，林超賢係做到香港一流既水準。我最愛既，始終係佢之前既<野獸刑警>，而家既市道，港產片係需要<證人>多D；<性工作者2>，睇之前我一早知同<性工作者之十日談>完全冇關係，不過既然邱禮濤將兩套戲連埋，我就比較下兩者啦，今集既題材係比上集嚴肅、沉重。娛樂性相對上冇咁豐富，今次主寫比做大廳小姐既低下既企街，好似<金雞>咁，講雞之餘，同時會帶出一D過去社會議題，當然唔會有吳君如咁歡樂。好喜歡邱禮濤既人文情懷，香港始終有你。劉美君真係做到專業，近年金馬金像獎既影后都俾章子怡、周迅等既內地演員壟斷，應該要到港產片威一威。雖然套戲題材偏鋒D，但係得5間院上(港島區一間都冇添)真係太唔公平，難道院商會認為<絕代雙嬌>(34院)或者<狼牙>(31院)會吸引多咁多人咩？過兩日<地球停轉日>上畫，基本上可以同之前上畫既所有戲埋單。

另外買左隻<蝙蝠俠-黑夜之神>既BD，哩隻係我第一隻買既電影BD，我亦相信係我黎緊5年唯一一套會自己買既電影BD。其實基本上，我睇DVD已經覺得好清好滿足，而BD碟既價錢著實非常咁貴。而家照我睇，BD要普及到好似今日既DVD應該重要多七、八年時間，今次買隻蝙蝠俠，純粹係因為有部PS3又有HDMI輸出，覺得應該要有番隻勁野"坐鎮"，所以就揀左套我認為全年拍得最好既電影黎擔此重任。